VAMPIR V SLOVJANSKOJ TRADICIJI post 2/2
🧟♂ Měh s krvju i Vampiroviči: Vygled i Obyčaji
Ako v prvom postu jesmo doznali, kto se staje vampirom, to teper razberemo se, kako on vygledaje, čim se zanimaje v nočah i, najvažnějše, kako se od njego spasiti. Ostrěgajam: opis vygleda slovjanskogo vampira može pokvariti apetit!
👀 Portret Čudovišča
Slovjani věrili, že vampir ohranjaje vygled konkretnogo umrlogo člověka i nosi tu samu odeždu, v kotoroj byl pohoronjeny. Ale odličenja od živyh byli udarnymi i groznymi.
Znaki vampira u različnyh narodov:
🔹 Ogromny rost, neproporcionalno velika glava i zuby.
🔹 Prisutnost repa.
🔹 Čudny narost pod kolěnom (smotrělo se, že tam se nahodi otvor dlja duše).
🔹 Otsutnost brvij, nosa, hrěbta ili daže ruk (v někotoryh věrenjah).
🔹 Barva: Absoljutno u vsěh Slovjanov vampir iměl črveno lice i poněkoly črvene oči.
Najgroznějši opis dali južni Slovjani: oni smotrili, že vampir jest naduty kako měh. On nema kostij, a tělo jest samo koža, naplnjena krvju do samogo vrha. Diky otsutstvu kostij on mogl prolězati v najmenjše otvory.
🐾 Majstor Maskirovanja
Prvyh 40 dnij poslě pogreba vampir jest osobivo neuhvatlivy. Južni Slovjani věrili, že v to vrěme on jest nevidimy ili se javjaje v podobě sěni, větru.
Blgari i Srbi věrili, že on može se prětvorti v životinju — ale ne v kakogokoli, a točno v tu, kotora prěskočila črez jego tělo prěd pogrebom! V takom zvěrskom obliku on se javjal čužim ljudjam, a svojim rodnym pokazoval se v člověčjem vygledě.
🌙 Nočno Žitje i Rodina
Vampir izhodil na lov v noči i vracal se v grob s prvymi pětuhmi. Jego žrrtvami stavali se najbězobronnějši: děti, mladomanželi, spęči ljudi, i prědovsim — jego sobstvene rodny i znajomi. On dušil ih ili pil krv.
Ale on škodil ne samo ljudjam:
🐎 Skot: Blgari věrili, že on cělu noč gonja konje i kravy, vypivajuči krv u molodogo skotu. Ukrajinci smotrili, že vampir (takože kako i vědma) «otbira» mlěko od krav.
🧶 Gospodarstvo: U južnyh Slovjanov vampir se vodil kako poltergajst — razmetival veči, zapletal niti v tkačskom krosnu, razlival vodu.
🧙♀ Vlast: Ukrajinci věrili, že vampir jest «staršim» nad vědmami i daže vozi ih na šabaš.
Čudnovato, ale v srbskyh i blgarskyh byličkah sut sjužety o vampirah, u ktoryh s vrěmenem vyrostali kosti. Taki vampir mogl odjehati v drugo selo i daže oženiti se s živoju ženoju! Děti od takogo braka — «vampiroviči» («vampirovići») — sami mogli stati vampirami, ale v Srbiji věrili, že oni se rodžajut s darom viděti i ubivati upyrev.
A u Poljakov i Kašubov byl svoj strah: vampir mogl ubivati ljudij golosom, vykrikivajuči ih imena. Kto uslyši i otzove se — umiral.
🛡 Arsenal Oborony: Mak, Trnje i Česnok
Naši prědki razrabotali cěly sistem zaščity.
Pogrebna magija (Vzchodni Slovjani): Da by se pokojnik ne vratil, grob i put od doma do grobišča posypali makom ili prosom. Mnělo se, že vampir ne bųde mogl projti, dokolě ne zbere koždo zrno.
Tělěsna poškodženja (Južni Slovjani): Trup mogli rězati na česti, podrezati žily pod kolěnami ili vbodnuti ostre predmety v pety. V Srbiji i Blgariji na tělo kladli rybarsku sět (da by se v njoj zaplel) ili predmety domašnjego ognišča.
Zaščita Doma: Ako vampir uže vstal, v hod išli česnok, trut i ognjivo. Južni Slovjani stvorjali okolo doma magičny krug iz trnja, ukrěpili bodlive větvi v oknah, dverjah i daže vtykali ih v ključovu dieru.
⚰ Poslědnji Argument
Uništiti vampira moglo se samo radikalnymi metodami:
▶ Zabiti v tělo ili v grob kol (najlěpje osinovy ili trnovy).
▶ Rozkopati grob, odrubiti glavu i položiti ju medžu nogami pokojnika s licem do dola — da by nikogda ne mogl najdti svoje tělo i vstati.
ꏍꏍꏍꏍꏍꏍꏍ
👇 Pytanje k vam: Po opytu naših prědkov vampira možno ostanoviti, rasypavši prěd njim zrna — on počne ih manično sbirati. Kako vy myslite, kaka navjazliva ideja mogla by ostanoviti modernogo «vampira»? Može byti, potrěba pročitati vsě izvěščenja v telefoně? 😄
Podrobnějše po temě čitajte: «Slovjanske starožitnosti» Etnolingvističny slovar pod red. N. I. Tolstogo.
#slavicmythology #mythologyofslavs #slovjanskamitologija #mitologijaslovjanov