Suša od «založnyh»: Magija oskvrnjenogo groba
Govorili jesmo o «čistom» obredu pri studencu. No čto, ako pričina suše jest inaka? Čto, ako nebo jest «zamknuto» črěz gněv?
🔥 V Polěsju, kako i po celom slovjanskom světu, věrili: dluga suša — věrny znak, že v selě jest «nečisty» pokojnik.
Rěč ide o «založnyh» — tyh, kto umrl «ne svojeju» smrtju i ne prijal dostočnogo upokojenja: samoubijcah (oběšenikah, utopljenikah), ubityh, prokljatyh. Takyh mrtvcov zabranjeno bylo pogrebati na občem, osvećenom grobišču.
⚰ Ako li občina iz straha ili žalosti prěkršila zabranu i pogrebovala utopljenika ili samoubijcu na grobišču, smatralo se, že zemja jest oskvrnjena. Ona «ne prijimaje» takogo mrtvca. Bog se gněvaje na celo selo, i nastupaje suša.
Čto činiti? Svršiti obrotny, strašny obred.
💧 Najbolje «mekym» sposobom bylo iti na grob «nečistogo» i polivati jego vodoju. To byl akt simpatičeskoj magije: «My lijemo vodu na tebe, vinovnika, a ty (věrněje, Bog črěz tebe) — lij na nas». Često to činili s grobami utopljenikov — ih su mněli «gospodarjami» vody, ktori «vzeli» ju s soboju i ne pušćajut.
⛏ Ako to ne pomagalo, občina šla na krajnje měry. Muži izryvali krst s groba oběšenika ili utopljenika. Ponekodgda krst trikrat izryvali i vtykali nazad, «vbivajuči» jego v zemju.
💀 Ale ako i to ne pomagalo, obred svrševal se vo vsej svojej prvobytnoj moći. Ljudi izkopavali trup iz groba. D.K. Zelenin, na kotorogo posylaje se i Tolstoj, sbral množstvo takyh svědočestv. Oskvrnjeno tělo vynosili s grobišča i metali v rěku ili boloto. To bylo jego «pravilno» pogrebenje — povračenje vody vodě, ognja ognju, nečistogo nečistomu. I jedino togda, po věrovanijam prědkov, zemja se očišćala, i nebesa «otkrivali se».
ꏍꏍꏍꏍꏍꏍꏍ
Žasno jest usvědomjati si, že radi prěžyvanja občiny naši prědki byli gotovi potrěvožiti pokoj mrtvyh. Strah prěd gladom byl silnějši než strah prěd grěhom. Kako vy myslite: odzvuki togo mističnogo straha prěd «zloju smrtju» (samoubijstvom ili gibelju pri čudnyh obstojateljstvah) živut v nas do dnes, ili jesmo okončateljno stali racionalnymi ljudmi?
Podrobnějše o temě čitajte: N.I. Tolstoj «Očerki slovjanskogo poganstva».
#mifologijaslovjan #slovjanskamifologija